Kaypi tiyak yuyaykunaka yachankapakllami kan. Kayta yachashka jawaka, hampikkunapakman rinallami kanki. Kayta yachashpapash mana yuyanachu kanki hampikkuna shinami ña tukuyta alli yachani nishpa. Kaymanta tapuykunata charishpaka, kanpak hampikta tapunallami kanki.
Shuk millay unkuyta charinki nishpa willakpika, chay unkuyta hapiktaka yallitakmi llakichi ushan. Shinallatak ñukanchik ayllukunapashmi llakilla kankakuna.
Kay laya willayta chaskikpika shukkunaka mana yallitak llakirinkunachu, kutin shuktakkunaka achkatami llakirinkuna. Shukkunaka imata ruranatami yachankuna, shuktakkunaka mana yanchankunachu. Chaytami puntapi yuyaipi alli hapina kanchik. (3)
Chayta yachashpapash, ñukanchik kuyashka ayllu mashna pachata kawsashpa katina mana yachashkamantami llakirinchik, wakanchikpash. Chayta mana ruranaka sinchimi kan. ¿Imashinatak yanapana kanchik? ¿Imashinatak chay willayta chaskina kanchik?
Kay katik ishky valishka yuyaykunata killka katipay:
Yanapayta ushanki
Unkuyta hapikka achkata llakirinka, ayllupash mashikunapash payka asha pacha shina kachunka sakirina kakpipash payta yanapanata minishtikpika utka yanapana kankichik. (1)
Unkuyta hapikka ima unkuyta hapikpipash o ima shina kakpipash mana paylla kachun sakirinachu kanki. Payka shuktakkuna payta yanapankapak munashkata rikuna kan. (3)
Chayraklla willayta chaskikpika ashka tapuykunatami tiyanka, shinapash mana tukuyta kutichi ushankachu. Shinallatak ashka examenkuna rurana kanka, chaimanta mana yallitak llakirinkapakka chay unkuymanta willaykunata maskanaka allimi kanka.
Kanpak ayllumanta shukka shuk millay unkuyta charishkata chayraklla yachak chayakpika payka chay unkuymanta willaykuna alli mashkachun yanapana kanki. Chaypakka shuktak hampikkunaman rishpami yanapayta ushanki. (1)
Unkuyta charikka ima minishtirishkata rikuna
Unkushkaka paypak unkuymanta mana parlanata munakpika chaymanta mana parlanachu kanki. Paypak kawsayka chikanmi kanka, chaymantami pay ima minishtishkatami rikuna kanki. (2)
Chay unkuymanta mana parlakapak munankachari, shinapash payka paylla sakirichun mana munankachu, kipa chay unkuymantami parlankapak munankachari. Tukuy pay minishtishkata kuy ushanki, shinapash imata mana rurankapak munashkata mana ruranachu kanki. (3)
Unkushka ima mañashkatallami rurana kanki. Payka kan shina yuyachun mana imatapash ruranki. Chaimanta imapi yanapay ushashkata yachankapakka alli rikuna kanki. Wakin gentekunaka utka paypak unkuymanta ima shina allichinata maskan, kutin shuktakkunaka achka llakilla kashkamantami chaytaka mana ruray ushan. Chaymanta payta alli yanapankapak munashpaka pay ima shina kakta yuyaypi alli hapina kanki. (3)
Allita uyana
Unkushkata yanapashpa katinkapakka pay munashkakunallatami parlana kanki. (2) Paywan parlakka allita uyana kan. Unkushkaka ñawpa o kipa punllakunamanta parlankapak munanka. Alli uyashpaka shuk alli yanapak tukunki. Imata ña mana parlankapak tiyakpika mana llakirinkichu. Upalla sakikpika allimi kanman, shinami unkushkaka imata ninata yuyay ushanka, o wakankapak munankachari. Chaymantami utka rimanapak randika upalla sakirina kanki. (3)
Uyakushpaka kunanamanta jarkarinki. Unkushkaka paylla chay unkuyta charishkamantami p’iñarishka kay ushan, chaymanta payta kunakpika mana uyankachu.
Kanpak unkushka aylluka unkuymanta wañukrikpika imatatak ruray ushanki
Kay millay unkuymantami kanpak aylluka wañukrin nishpa willakpika shuktakkunapash kikinta yanapachun maskana kanki. (2) Wakinpika unkushkallapi yuyashkamanta, yanapashkamantapashmi kikinllapitak mana yuyay ushanki. Chaytaka mana allimi kan. (1)
Kikin ima manchaykunata charishpaka shuktakkunawan parlay ushanki. Kanpak ayllu wañukpika kipa punllakuna kikinpak kawsaytapashmi chikanyanka. Chaymantami kaymanta parlankapak yanapayta maskanki. (1)
Payka wañukrishmantami achka llakilla sintirishpapash, payka manarak wañushkata yuyarinami kanchik. Chaymantami paypak puchukay punllakuna kashkamanta paywan p’iñarishka kashpaka tukuyta allichi ushanki o imata manarak parlashkanki parlayta ushanki. (1)
Kaykunata rurana sinchi kakpipash “imata manarak paywan rurashkataka” rurana pachami kan. Tukuy wayrikunatami paywan kankapak, parlankapak, imata allichina kashkata allichinkapak hapinaka alli kan. Kawsayka chaypakmi kan, ñukanchik ayllukuwan kankapak.
¿Shuk psicólogo nishka hampikwan interntetpi parlankapak munankichu?
Psicólogo nishka hampikkunawan parlankapakka internetpi kaykunatami maskay ushanki: PsyAlive, Mejor Hablemos y Vivir Felizmente. Kay psicólogo nishka hampikkunaka riksishka hatun yachana wasikunapimi yachakushka, paykunaka titulokunapash, certificado nishka p’ankakunatapashmi charin. Chaymantami alli hampikkunami kan. Shuk psicólogo hampikkwan parlankapak munashpaka, o shuk willaylla kachankapak munashpaka kaypi rikupanki: